ҒЫЛЫММЕН ӨРІЛГЕН ҒҰМЫР

Университет қабырғасында профессор, педагогика ғылымдарының кандидаты – Пернайым Сағымбекқызының 80 жылдық мерейтойына арналған «Ғылыммен өрілген ғұмыр» атты шығармашылық кеш өтті.

Кешке Шерхан Мұртаза атындағы Халықаралық Тараз университетінің ректоры Махметғали Сарыбеков және ректор кеңесшісі, тарих ғылымдарының докторы, профессор Асқар Абдуалы, облыстық және қалалық Ардагерлер кеңесінің төрағалары Еркінбек Солтыбаев, Күләш Әбдікешова, Талас ауданы, Үшарал ауылдық округінің әкімі Самат Ақпанбетов пен Ардагерлер кеңесінің төрағасы Қыдырәлі Жүсіпов сынды құрметті қонақтар мен әріптес-замандастары, университеттің профессор-оқытушылар құрамы мен шәкірттері қатысты.

Жиынды Басқарма мүшесі – әлеуметтік-мәдени даму жөніндегі проректор Аслан Тұрлыбек ашып, жүрекжарды лебізін жеткізді. Аяулы ұстаздың мерейлі 80 жасқа толуымен құттықтап, еліміздің ғылым мен білім сапасын арттыруға қосқан орасан зор үлесін ерекше ықыласпен сөз етті. Ғалымның ұйымдастырушылық дарыны, кәсіби біліктілігі, қажырлы еңбегі мен қоғамның зияткерлік тұрғыда дамуына қосқан еңбегі университет тарапынан жоғары бағаланатынын айтып, Басқарма Төрағасы – Ректор Мұхтар Қазбекұлының құттықтау хаты мен М.Х.Дулати атындағы Тараз университетінің төсбелгісі мен куәлігін табыстады.

Шерхан Мұртаза атындағы Халықаралық Тараз университетінің ректоры Махметғали Сарыбеков құттықтау сөз алып, ғалымның оқу-білім жолында атқарған еңбегі жайлы сөз қозғады. Көптеген еңбектері бүгінгі күні де өзекті екенін атап, ғалымға зор денсаулық, ұзақ ғұмыр тілеп, естелік сыйлықтарын табыстады. 

Шерхан Мұртаза атындағы Халықаралық Тараз университетінің ректор кеңесшісі, тарих ғылымдарының докторы, профессор Асқар Абдуалы құттықтау сөз алып, педагогика ғылымына өз өмірін арнаған ғалым еңбегіне ерекше ықылас білдірді. Профессор Пернайым Сағымбекқызының ғылымға қосқан үлесі мен тәрбиесі – болашақ ұрпақ үшін теңдесі жоқ мұра екенін баса айтты.

Жиын барысында Пернайым Сағымбекқызының ғылыми-педагогикалық жолы, Қазақстанның білім саласына қосқан үлесі, ғылыми еңбектері және шәкірттеріне қалдырған мол мұрасы кеңінен баяндалып, насихатталды. Сонымен қатар, профессор Пернайым Сағымбекқызының ғылыми еңбегінің тұсаукесер рәсімі өтіп, ғалымның еңбегі жоғары бағаланды. Арнайы келген қонақтар мерейтой иесіне жылы лебіздерін білдіріп, гүл шоқтарын табыстады.

Ал, мерейтой иесі жеткен жетістігі тұлғалық ерекшеліктен өзге, көпшіліктің қолдауының арқасында болғанын айтты. Пернайым Сағымбекқызы университет басшылығына ерекше алғысын білдіріп, білім ордасы алдағы уақытта да биік белестерді бағындырып, алға қойған мақсат-міндеттерді жүзеге асыратындығына сенім білдірді. 

гумыр111

гумыр2222

гумыр3333

гумыр444

гумыр5555

гумыр666

гумыр7777

гумыр9999

гумыр14010

гумыр12 12

гумыр14 14

 

Прочитано 97 раз
Top