Дулати университетінің базасынан ашылған Д.И. Менделеев атындағы Ресей химиялық-технологиялық университетінің Тараз филиалында Ашық есік күні өтті. Іс-шараға мектеп бітіруші түлектер, ата-аналар, оқытушылар, химия саласының мамандары қатысты.
М.Х.Дулати атындағы Тараз университетінің Басқарма төрағасы-Ректор Мұхтар Байжұманов екі университет арасындағы ынтымақтастықтың маңыздылығына тоқталып, мақсат – халықаралық стандарттарға сай, бәсекеге қабілетті мамандар даярлау екенін алға тартып, үш жақты келісім білім мен ғылымның дамуына үлкен серпін береді деді.
РХТУ ректорының м.а Евгений Румянцев өз сөзінде университеттің халықаралық деңгейдегі маңыздылығын айтып, өндірістік тәжірибе және ғылыми зерттеулерге ерекше мән беретінін атап өтті.
Сондай-ақ, шараға “Қазфосфат” ЖШС жас мамандарды оқыту тобының жетекшісі Акмарал Дуйсенкуловна қатысып, химия саласындағы мамандар сұранысқа ие, болашақта РХТУ түлектері біздің командамыздың бір бөлігі болады деп сенемін деді.
Шара барысында Тараз филиалының директорының м.а. Фёдор Колоколов мектеп оқушыларың оқу ордасының тарихы, оқу процесімен таныстырып, оқуға түсу шарттары туралы толық ақпарат берді. Химия пәнінің мұғалімі, блогер Улан Усенов оқушыларға химия ғылымының қызықты тұстарын баяндап, химия - әлемді өзгертетін ғылым екенін алға тарта отырып, үлкен ғылымның бір бөлшегі болуға шақырды.
Келген қонақтар Дулати университеті ұйымдастырған көрмеге қатысып, өздерін қызықтырған сұрақтарға толық жауап алды. Көрме еңселі оқу ордамыз ұсынатын таптырмас мүмкіндіктері жайлы танысуға ең тиімді ақпараттық алаңның бірі болды.
