Университет қабырғасында Басқарма төрағасы – ректор Мұхтар Байжұманов білім саласына өзіндік үлесін қосып жүрген бірқатар ұстаздар мен білімгерлерге марапаттарын табыстады.
Бәсекеге толы болған тартысты байқауларда университеттің беделін көтеріп, абыройын асқақтатқан жеңімпаздарға Мұхтар Қазыбекұлы алғысын білдіріп, жылы лебізін жеткізді.
Салтанатты жиында Жамбыл облысының техникалық және кәсіптік білім беру саласын дамытудың 2024-2026 жылдарға арналған жол картасы негізінде Техникалық және кәсіптік білім беру ұйымдарының инженер-педагогтер арасында өткен «AUTOSKILLS» байқауында М.Х.Дулати атындағы Тараз университеті колледжінің оқытушысы Дамира Каримова 1 дәрежелі дипломмен марапатталды.
«Атамекен» Ұлттық кәсіпкерлер палатасының рейтингісі бойынша «Арнайы және әлеуметтік педагогика» кафедрасының меңгерушісі Гаухар Санайдың «Әлеуметтік педагогика және өзін-өзі тану» білім беру бағдарламасы республика бойынша 1 дәрежелі дипломмен марапатталды.
Қазақстан Республикасы жоғары оқу орындарының «Арнайы педагогика» білім беру бағдарламалары бойынша студенттер арасында өткен ХVІ Республикалық пәндік олимпиадасында командалық есеп бойынша М.Х.Дулати атындағы Тараз университеті үшінші орынға ие болды. Тартысты байқауда бақ сынаған студенттерімізге Айымжан Орынби, Ақсезім Болатқызы, Диана Наурызбай, Ботакөз Шамбулкерееваға арнайы сертификаттар табысталды. Сонымен қатар, команда жетекшісі Сабира Аликулова Алғыс хатпен марапатталды.
Марапат иелерін құттықтаймыз! Алдағы уақытта кәсіби табыс, жаңа жетістіктер, сәттілік және шығармашылық шабыт тілейміз!
